إيه أكتر حاجة بتخاف منها في الدنيا؟؟

إيه أكتر حاجة بتخاف منها في الدنيا ؟؟

فيه ناس بتخاف من الظلام
وناس بتخاف من المجهول
وناس بتخاف من الجن والعفاريت والشياطين
وممكن تخاف من الأماكن المغلقة أو المرتفعات
واكيد بتخاف من الموت
وبتخاف من الألم الشديد الغير محتمل
بتخاف من الذل والفقر وشماتة الناس
وكتر مننا بيخاف من كائنات زي الحيات والعقارب وغيرها !
ممكن تخاف من أصوات غريبة تبعث في نفسك الخوف !
ممكن تخاف لو شفت فيلم رعب مع ان اللي عاملينه ناس زيهم زيك وتفكيرهم محدود ومع ذلك ممكن تفضل مرعوب ومش عارف تنام من الخوف !
ومخاوف تانية كتير !

لو شفنا اي حاجة ممكن تخوفنا في الدنيا هنلاقيها موجودة في جهنم !
جهنم مش مجرد نار بتحرق وخلاص
جهنم دي منظومة رعب واللي خلقها رب البشر يعني فيها اللي عمرنا ما نقدر نتخيله من عذاب وخوف وألم ورعب
لو بتخاف من الظلام فجهنم سوداء مظلمة مفيش فيها بصيص من النور
مش عارف إيه اللي حواليك كل الأمور مجهولة بالنسبة لك مش عارف ايه اللي مستنيك تاني غير العذاب والألم اللي فوق قدرة البشر على الاحتمال سامع أصوات صراخ وأصوات رعب سامع صوت جهنم نفسها وحسيسها اللي يبعث الرعب في اشد النفوس قوة وبأس !

تخيل طعام أهل النار بيكون إيه ؟ صديد وقيح وعصارة أهل النار وطلع شجرة الزقوم اللي شبه رؤوس الشياطين ! مع إننا ما نعرفش الشياطين شكلهم إيه بس اكيد أن أشكالهم مرعبة بالنسبة لنا
تخيل شرب اهل النار إيه ؟ يشربونا ماءً حميما حارًا يغلي يقطع أمعاءهم ويشوي بطونهم !

لو بتخاف من الحيات والعقارب فأهل النار يهربون من حيات وعقارب جهنم إلى النار فعذاب النار بالنسبة لهم اهون من عذاب الحيات والعقارب !
لو بتخاف من الأماكن المغلقة فجهنم موصدة على كل من فيها على ابوابها ملائكة غلاظ شداد يعني مفيش مخرج ولا مهرب منها .
لو بتخاف من المرتفعات فكلمة قد تقولها تُغضب بها الرحمن تهوي بها في النار سبعين خريفا ! متخيل يعني إيه تسقط من مرتفعات لمدة سبعين سنة !!
لو بتخاف من الذل فأي ذل قد تلقاه أكبر من هذا ؟! وأي شماتة قد تلقاها وملائكة النار بيجروك وانت مكبل بأغلال من قطران ليلقوك في النار !

واكيد أكبر مخاوفنا في الدنيا هيا الموت تخيل ان اهل النار بيتمنوا الموت ليرتاحوا من العذاب يتمنوا انهم يكونوا تراب حتى يتمنوا يكون فيه أمل إنهم يخرجوا من النار يعد كام سنة ! لكن تقول لهم الملائكة إنكم ماكثون إنكم خالدون فيها أبدااا .
مهما تخيلنا جهنم ممكن يكون شكلها إيه عقولنا ستظل عاجزة عن الاستيعاب
تخيلوا إننا كلنا سنرد جهنم !

كلنا هنمر على صراط ممدود على جهنم ادق من الشعرة وأحد من السيف مظلم على حافتيه كلاليب وخطاطيف تمسك بمن أمرت به فيلقي في النار
كلنا هنعدي عليه والنار أسفل منا سوداء مظلمة كل واحد منا هيمشي على قدر نوره لو عملك خير في الدنيا هيبقى ليك نور تشوف بيه وتمر بسلام لتجد الجنة بانتظارك
اما لو كنت من أهل النار أعاذنا الله منها فيكون نصيبك خطاف من خطاطيف النار .
ربنا حذرنا من النار وعذابها كتير في كتابه الكريم ومع ذلك لسة تايهين في الدنيا نستهين بالعذاب فاكرين عذاب جهنم ده عادي وسهل زي المشركين لما قالوا هنقعد فيها كام سنة ونخرج !! ولا لما استهانوا بخزنة جهنم وافتكروا إنهم هيقدروا يخرجوا منها !
مهما كنت عايش في ترف ونعيم في الدنيا بغمسة واحدة في النار هتنسى كل النعيم اللي عشته !
الحمد لله إننا لسة عايشين ولسة الفرصة قدامنا نتغير ونعمل أعمال صالحة قبل من الفرصة دي تضيع مننا ونندم ساعتها وقت لا ينفع الندم 
‫#‏نبذة_عن_جهنم‬